গুৱাহাটী বিশ্ববিদ্যালয়ত টাই - আহোম ভাষা বিষয়ক পাঠ্যক্ৰম মুকলি

 গুৱাহাটী, এপ্ৰিল ২৭ : 'ৰাষ্ট্ৰীয় শিক্ষানীতি ২০২০' ৰ পৰিকাঠামোক গুৰুত্ব প্ৰদান কৰি এক ঐতিহাসিক পদক্ষেপ হিচাপে গৌৰৱময় টাই-আহোম ভাষাক শৈক্ষিক দিশৰ জৰিয়তে বিশ্ব দৰবাৰত অধিক প্ৰচাৰ আৰু প্ৰসাৰ কৰি গৱেষণাৰ দিশত উল্লেখযোগ্য অৱদান আগবঢ়োৱাৰ অৰ্থে গুৱাহাটী বিশ্ববিদ্যালয়ৰ 'চেণ্টাৰ ফৰ চাউথ ইষ্ট এছিয়ান ষ্টাডিজ'ৰ উদ্যোগত আৰম্ভ হোৱা 'Six-Months Certificate Course in Tai Ahom Language and Medieval Manuscriptology' শীৰ্ষক পাঠ্যক্ৰমৰ উদ্বোধনী অনুষ্ঠান এক গাম্ভীৰ্যপূৰ্ণ পৰিৱেশৰ মাজেৰে সম্পন্ন হয়। 

উদ্বোধনী অনুষ্ঠানত মুখ্য অতিথিৰূপে উপস্থিত থাকি গুৱাহাটী বিশ্ববিদ্যালয়ৰ ইতিহাস বিভাগৰ সন্মানীয় প্ৰাক্তন অধ্যাপক তথা বিশিষ্ট ইতিহাসবিদ পদ্মশ্ৰী যোগেন্দ্ৰ নাথ ফুকনদেৱে উল্লেখ কৰে যে, “টাই-আহোম ভাষা আৰু ইতিহাস আমাৰ পৰিচয়ৰ অবিচ্ছেদ্য অংশ। এই ভাষাৰ সংৰক্ষণ আৰু গৱেষণা কেৱল শৈক্ষিক কৰ্ম নহয়, ই আমাৰ ঐতিহ্য ৰক্ষা কৰাৰ এক দায়িত্ব।”

পাঠ্যক্ৰম উদ্বোধন কৰি উপাচাৰ্য অধ্যাপক ননী গোপাল মহন্তদেৱে ভাষা এটা জাতিৰ জীৱন্ত পৰিচয় আৰু ইয়াৰ পুনৰুত্থানেই সাংস্কৃতিক স্বাভিমানৰ পুনৰ জাগৰণ বুলি উল্লেখ কৰি কয় যে, "ভাষা এটা জাতিৰ প্ৰাণ; ইয়াৰ পুনৰুজ্জীৱনেই সাংস্কৃতিক স্বাভিমানৰ পুনৰোদয়। Indigenous Knowledge System (IKS)ৰ জৰিয়তে আমাৰ ঐতিহ্যগত জ্ঞানক বিজ্ঞানভিত্তিক গৱেষণা আৰু সৃষ্টিশীল চিন্তাৰে অধিক সমৃদ্ধ কৰি আগবঢ়াই নিব লাগিব। পুথি-পাণ্ডুলিপিসমূহ কেৱল অতীতৰ স্মৃতিচিহ্ন নহয়, ই অমূল্য জ্ঞানভাণ্ডাৰ হিচাপে আমাৰ ভৱিষ্যত নিৰ্মাণত পথপ্ৰদৰ্শকৰ ভূমিকা পালন কৰে।”

উদ্বোধনী অনুষ্ঠানত পঞ্জীয়ক অধ্যাপক উৎপল শৰ্মা, শৈক্ষিক পঞ্জীয়ক অধ্যাপক ৰাজীৱ সন্দিকৈ, অধ্যাপক ধ্ৰুৱ প্ৰতিম শৰ্মা, বিশিষ্ট শিক্ষাবিদ ড⁰ দয়ানন্দ বৰগোহাঁই, ড⁰ বিজু মৰাণ, ড⁰ নিত্যানন্দ গগৈ সমন্বিতে অধ্যাপক, গৱেষক তথা ছাত্ৰ-ছাত্ৰী উপস্থিত থাকে।