গুৱাহাটী বিশ্ববিদ্যালয়ত ডাঃ ৰণোজ পেগুৰ দ্বাৰা FYUGP ৰ চতুৰ্থ বৰ্ষৰ কাৰ্যকৰী নিৰ্দেশনা, NEP Ready Reckoner 2026 আৰু FAQ বুকলেট উন্মোচন

 গুৱাহাটী, ১৯ জুন:  অসমৰ মাননীয় শিক্ষামন্ত্ৰী ডাঃ ৰণোজ পেগুৱে আজি গুৱাহাটী বিশ্ববিদ্যালয়ৰ অন্তৰ্গত সংলগ্ন মহাবিদ্যালয়সমূহত চাৰি বছৰীয়া স্নাতক কাৰ্যসূচী (FYUGP) ৰ চতুৰ্থ বৰ্ষ কাৰ্যকৰী কৰাৰ বাবে প্ৰস্তুত কৰা নিৰ্দেশনা প্ৰদান কৰাৰ লগতে *NEP Ready Reckoner 2026* আৰু *FYUGP ৰ চতুৰ্থ বৰ্ষ সম্পৰ্কীয় FAQ বুকলেট* উন্মোচন কৰে। 

বিশ্ববিদ্যালয়ত অনুষ্ঠিত এই অনুষ্ঠানত উপাচাৰ্য অধ্যাপক ননী গোপাল মহন্ত, অসম কলেজ অধ্যক্ষ পৰিষদৰ প্ৰতিনিধিসকল, লগতে অনুষ্ঠানত বিভিন্ন অনুষদৰ ডীন, শিক্ষক-শিক্ষয়িত্ৰী, বিশ্ববিদ্যালয় শ্ৰেণীৰ সচিব, সংলগ্ন মহাবিদ্যালয়সমূহৰ অধ্যক্ষ, শিক্ষাবিদ আৰু অন্যান্য বিশিষ্ট ব্যক্তিসকল উপস্থিত থাকে।

অনুষ্ঠানটিত ভাষণ প্ৰদান কৰি ডাঃ পেগুৱে এই নিৰ্দেশনাপত্ৰ প্ৰস্তুত কৰাৰ বাবে গুৱাহাটী বিশ্ববিদ্যালয়ক অভিনন্দন জনায় আৰু ইয়াক বিশ্ববিদ্যালয়খনৰ এক উল্লেখযোগ্য পদক্ষেপ বুলি অভিহিত কৰে। লগতে FAQ বুকলেট প্ৰস্তুত কৰাৰ লগত জড়িত সকলোকে ধন্যবাদ জ্ঞাপন কৰে।

তেওঁ কয়, “যেতিয়াই কোনো জটিলতা, সংকট বা বিভ্ৰান্তিকৰ পৰিস্থিতিৰ সৃষ্টি হয়, তেতিয়া আমি তাৎক্ষণিক প্ৰতিক্ৰিয়া ব্যক্ত নকৰো; বৰঞ্চ চিন্তাশীলভাৱে পদক্ষেপ গ্ৰহণ কৰো।” তেওঁ উল্লেখ কৰে যে এনে বিষয়সমূহৰ ক্ষেত্ৰত ধৈৰ্যসহকাৰে আলোচনা, সংশ্লিষ্ট অংশীদাৰসকলক চিহ্নিতকৰণ আৰু সময়মতে পৰামৰ্শ বিনিময় অতি প্ৰয়োজনীয়। তেওঁ লগতে কয় যে ৰাজ্য চৰকাৰে সদায় দায়বদ্ধভাৱে কাম কৰে আৰু কোনো সমস্যাৰ আগতীয়া সংকেত লাভ কৰিলে তৎপৰভাৱে হস্তক্ষেপ কৰে।

অনুষ্ঠানত বিশ্ববিদ্যালয়ৰ পঞ্জীয়ক অধ্যাপক উৎপল শৰ্মাই আদৰণি ভাষণ আগবঢ়ায়। ইয়াৰ পাছতে উপাচাৰ্য অধ্যাপক ননী গোপাল মহন্তই উদ্বোধনী ভাষণ প্ৰদান কৰে আৰু মাননীয় শিক্ষামন্ত্ৰী ডাঃ ৰণোজ পেগুৱে মূল ভাষণ আগবঢ়ায়। শলাগৰ শৰাই আগবঢ়ায় শৈক্ষিক পঞ্জীয়ক অধ্যাপক ৰাজীৱ সন্দিকৈয়ে।

উদ্বোধনী ভাষণত অধ্যাপক মহন্তই কয় যে FYUGP ৰ চতুৰ্থ বৰ্ষ প্ৰৱৰ্তনৰ ক্ষেত্ৰত কিছু বাস্তৱধৰ্মী প্ৰশাসনিক আৰু একাডেমিক প্ৰত্যাহ্বান আছে, কিন্তু এই প্ৰত্যাহ্বানসমূহক বাধা হিচাপে নহয়, সুযোগ হিচাপে গ্ৰহণ কৰা উচিত। তেওঁ কয়, “এটা প্ৰত্যাহ্বানপূৰ্ণ পৰিস্থিতিক দুটা ধৰণেৰে চাব পাৰি। এফালে আমি সেই প্ৰত্যাহ্বানৰ ওচৰত আত্মসমৰ্পণ কৰিব পাৰো, আনফালে ইয়াক নতুনভাৱে চিন্তা আৰু পথ নিৰ্ধাৰণ কৰাৰ সুযোগ হিচাপে গ্ৰহণ কৰিব পাৰো। আমি দ্বিতীয় পথটো বাছি লৈছো।”

NEP 2020 ৰ লক্ষ্য আৰু দৃষ্টিভংগীৰ সৈতে সামঞ্জস্য ৰাখি প্ৰস্তুত কৰা এই নিৰ্দেশনাপত্ৰত **Honours** আৰু **Honours with Research** এই দুটা ধাৰাৰ জৰিয়তে চতুৰ্থ বৰ্ষ আৰম্ভ কৰাৰ স্পষ্ট ৰূপ দাঙি ধৰা হৈছে। ইয়াৰ এক গুৰুত্বপূৰ্ণ ব্যৱস্থা হৈছে, Major বিষয় চলাই থকা সকলো মহাবিদ্যালয়ে স্নাতকোত্তৰ পাঠ্যক্ৰম নাথাকিলেও চতুৰ্থ বৰ্ষ আৰম্ভ কৰিব পাৰিব।

২০২৬-২৭ শিক্ষাবৰ্ষৰ বাবে মসৃণ ৰূপান্তৰ নিশ্চিত কৰিবলৈ বিশেষ সুবিধাও অন্তৰ্ভুক্ত কৰা হৈছে। ইয়াৰ ভিতৰত আছে বেকলগ থকা শিক্ষাৰ্থীসকলৰ বাবে Honours ধাৰাত নামভৰ্তিৰ সুযোগ, গৱেষণা তত্ত্বাৱধান আৰু প্ৰয়োজনীয় আন্তঃগাঁথনি সম্পৰ্কীয় সহজ ব্যৱস্থা। লগতে চতুৰ্থ বৰ্ষ সফলতাৰে সম্পূৰ্ণ কৰা যোগ্য শিক্ষাৰ্থীসকলৰ বাবে প্ৰত্যক্ষভাৱে PhD ত ভৰ্তি হোৱাৰ পথো মুকলি কৰা হৈছে, যিয়ে উচ্চশিক্ষা আৰু গৱেষণাৰ নতুন সম্ভাৱনাৰ দুৱাৰ উন্মোচন কৰিব।

ডাঃ পেগুৱে ৰাজ্যৰ উচ্চশিক্ষা খণ্ডত চলি থকা সংস্কাৰৰ বিষয়েও আলোকপাত কৰে। তেওঁ পুৰণি আৰু প্ৰাসংগিকতা হেৰুৱাই পেলোৱা পাঠ্যক্ৰমসমূহ পুনৰ মূল্যায়ন কৰা, উদ্যোগ প্ৰতিষ্ঠানৰ সহযোগত নতুন পাঠ্যক্ৰম আৰম্ভ কৰা আদি পদক্ষেপৰ কথা উল্লেখ কৰে। তেওঁ অসমত সম্পূৰ্ণৰূপে উদ্যোগখণ্ডৰ দ্বাৰা ৰূপায়িত প্ৰথম পাঠ্যক্ৰম আৰম্ভ কৰাৰ কথাও উল্লেখ কৰে।

ইয়াৰ উপৰিও বিশ্ববিদ্যালয় আৰু মহাবিদ্যালয়সমূহত চলি থকা Self-Financing Course সমূহৰ ক্ষেত্ৰত চৰকাৰৰ নীতি স্পষ্ট কৰি তেওঁ কয় যে এই পাঠ্যক্ৰমসমূহক সুস্পষ্ট নিয়ন্ত্ৰণমূলক ব্যৱস্থাৰ আওতালৈ অনা হ'ব, নহ’লে প্ৰয়োজন সাপেক্ষে বন্ধ কৰা হ'ব। লগতে শিক্ষকসকলৰ বাবে স্থায়ী আৰু পাৰিশ্ৰমিক ক্ষেত্ৰ নিশ্চিত কৰাৰ বিষয়েও গুৰুত্ব আৰোপ কৰে।

অধ্যাপক মহন্তই অসম কলেজ অধ্যক্ষ পৰিষদৰ অধ্যক্ষৰ অৱদানৰ কথাও বিশেষভাৱে উল্লেখ কৰে। তেওঁ কয় যে NEP Ready Reckoner খন শিক্ষাৰ্থী, শিক্ষক আৰু অধ্যক্ষসকলৰ সুবিধাৰ কথা চিন্তা কৰি চিত্ৰভিত্তিক ৰূপত প্ৰস্তুত কৰা হৈছে, যাতে নামভৰ্তিৰ পৰা মূল্যায়ন আৰু পাঠ্যক্ৰম সম্পূৰ্ণ কৰা পৰ্যন্ত সমগ্ৰ যাত্ৰাপথ সহজে বুজিব পৰা যায়।

তেওঁ লগতে স্পষ্ট কৰে যে এই নথি চূড়ান্ত ৰূপৰ নহয়। অসম কলেজ শিক্ষক সন্থা, অসম কলেজ অধ্যক্ষ পৰিষদ আৰু অন্যান্য অংশীদাৰসকলৰ পৰামৰ্শৰ ভিত্তিত আগন্তুক দিনত ইয়াত প্ৰয়োজনীয় সংযোজন আৰু সংশোধন কৰা হ'ব।