গুৱাহাটী বিশ্ববিদ্যালয়ত ৰাজ্যিক পৰ্যায়ৰ ৰেড ৰান মাৰাথন প্ৰতিযোগিতা অনুষ্ঠিত

 

গুৱাহাটী, ২৩ অক্টোবৰ, ২০২৬: গুৱাহাটী বিশ্ববিদ্যালয়ৰ ৰেড ৰিবন ক্লাবৰ উদ্যোগত আৰু অসম ৰাজ্যিক এইডছ নিয়ন্ত্ৰণ সমিতি (ASACS)-ৰ সহযোগত ২৩ অক্টোবৰ, ২০২৬ তাৰিখে গুৱাহাটী বিশ্ববিদ্যালয়ত ৰাজ্যিক পৰ্যায়ৰ ৰেড ৰান মাৰাথন প্ৰতিযোগিতা অনুষ্ঠিত হয়। এই প্ৰতিযোগিতাৰ মূল উদ্দেশ্য আছিল এইচ আই ভি/এইডছ সম্পৰ্কে সজাগতা সৃষ্টি কৰা, সুস্থ জীৱনশৈলী গঢ়ি তোলাত উৎসাহিত কৰা আৰু এইচ আই ভি প্ৰতিৰোধ, বৈষম্য হ্ৰাস তথা সামাজিক দায়বদ্ধতাৰ বাৰ্তা যুৱ প্ৰজন্মৰ মাজত প্ৰচাৰ কৰা।

অনুষ্ঠানত মুখ্য অতিথি হিচাপে উপস্থিত থাকি অসমৰ মাননীয় ক্ৰীড়া মন্ত্ৰী শ্ৰীযুত বিশ্বজিৎ দৈমাৰীয়ে কয় যে গুৱাহাটী বিশ্ববিদ্যালয়ৰ ৰেড ৰিবন ক্লাব আৰু অসম ৰাজ্যিক এইডছ নিয়ন্ত্ৰণ সমিতিৰ এই সহযোগিতাই যুৱ শক্তিৰ বিকাশ আৰু জনস্বাস্থ্য সম্পৰ্কীয় সজাগতা বৃদ্ধিৰ প্ৰতি উভয় পক্ষৰ উমৈহতীয়া দায়বদ্ধতাক প্ৰতিফলিত কৰিছে।

তেওঁ লগতে উল্লেখ কৰে যে এনে পদক্ষেপে বিশ্ববিদ্যালয় আৰু ছাত্ৰ-ছাত্ৰীৰ সংগঠনসমূহক সজাগতা, সহমৰ্মিতা আৰু সামাজিক পৰিৱৰ্তনৰ দূত হিচাপে যুৱ প্ৰজন্মক আগুৱাই নিয়াত গুৰুত্বপূৰ্ণ ভূমিকা পালন কৰিবলৈ উৎসাহিত কৰে।গুৱাহাটী বিশ্ববিদ্যালয়ৰ বিশ্ববিদ্যালয় শ্ৰেণীসমূহৰ সচিব তথা ছাত্ৰ কল্যাণ সঞ্চালক ড° ৰঞ্জন কুমাৰ কাকতিয়ে মুখ্য অতিথি আৰু অন্যান্য বিশিষ্ট অতিথিসকলক আদৰণি জনায়। তেওঁ কয় যে ৰেড ৰান মাৰাথন প্ৰতিযোগিতাই ক্ৰীড়া আৰু শাৰীৰিক সুস্থতাৰ সৈতে এইচ আই ভি/এইডছ তথা ইয়াৰ সৈতে জড়িত জনস্বাস্থ্যৰ বিষয়সমূহৰ প্ৰতি সজাগতা সৃষ্টিৰ এক গুৰুত্বপূৰ্ণ মঞ্চ হিচাপে কাম কৰে। ৰাজ্যৰ বিভিন্ন প্ৰান্তৰ যুৱক-যুৱতীসকলক একত্ৰিত কৰি এই পদক্ষেপে তেওঁলোকৰ মাজত সঠিক জ্ঞান, সুস্থ অভ্যাস আৰু বৈষম্যহীন তথা সহায়ক সমাজ গঢ়ি তোলাৰ মনোভাৱ বিকাশত সহায় কৰে।

অনুষ্ঠানত গুৱাহাটী বিশ্ববিদ্যালয়ৰ পঞ্জীয়ক অধ্যাপক উৎপল শৰ্মাও উপস্থিত থাকে। তেওঁ শিক্ষানুষ্ঠান আৰু জনস্বাস্থ্যৰ সৈতে জড়িত সংস্থাসমূহৰ মাজত সহযোগিতা শক্তিশালী কৰি ছাত্ৰ-ছাত্ৰী আৰু যুৱ প্ৰজন্মক সজাগতা সৃষ্টিৰ কাৰ্যসূচীত জড়িত কৰাৰ গুৰুত্বৰ ওপৰত আলোকপাত কৰে।ইয়াৰ উপৰি অসম ৰাজ্যিক এইডছ নিয়ন্ত্ৰণ সমিতিৰ প্ৰতিৰোধ শাখাৰ উপ-সঞ্চালক শ্ৰীযুত জে. পি. শৰ্মা, সহকাৰী সঞ্চালক শ্ৰীযুত ৰাজীৱ শৰ্মা আৰু যুৱ পৰিক্ৰমা শাখাৰ সহকাৰী সঞ্চালক শ্ৰীযুত পল্লৱ জ্যোতি হাজৰিকা উপস্থিত থাকে। 

অনুষ্ঠানত বিশ্ববিদ্যালয়ৰ বিষয়ববীয়া আৰু ৰাজ্যৰ বিভিন্ন প্ৰান্তৰ ২০০ৰো অধিক প্ৰতিযোগীয়ে অংশগ্ৰহণ কৰে।প্ৰতিযোগিতাৰ ল'ৰাৰ শাখাত মাটিবৰ আলী (সুৰেন দাস মহাবিদ্যালয়, গুৱাহাটী বিশ্ববিদ্যালয়) য়ে প্ৰথম স্থান, বিজু কিষাণ (ৰঙাপৰা মহাবিদ্যালয়, গুৱাহাটী বিশ্ববিদ্যালয়) য়ে দ্বিতীয় স্থান আৰু শুভম কুমাৰ (এল. এন. আই. পি. ই.) য়ে তৃতীয় স্থান লাভ কৰে।ছোৱালীৰ শাখাত  পাহী কেওট (ড° বি. কে. বি. মহাবিদ্যালয়, গুৱাহাটী বিশ্ববিদ্যালয়) য়ে প্ৰথম স্থান,  চায়না খাতুন (দক্ষিণ শালমৰা মহাবিদ্যালয়, গুৱাহাটী বিশ্ববিদ্যালয়) য়ে দ্বিতীয় স্থান আৰু গায়ত্ৰী দাস (ৰঙাপৰা মহাবিদ্যালয়, গুৱাহাটী বিশ্ববিদ্যালয়) য়ে তৃতীয় স্থান লাভ কৰে।

প্ৰতিযোগিতাৰ বিজয়ীসকলক নগদ পুৰস্কাৰ, পদক, ট্ৰফী আৰু প্ৰমাণ-পত্ৰ প্ৰদান কৰা হয়।এই ৰাজ্যিক পৰ্যায়ৰ ৰেড ৰান মাৰাথন প্ৰতিযোগিতাই এইচ আই ভি/এইডছ সম্পৰ্কে সজাগতা বৃদ্ধি, প্ৰতিৰোধমূলক ব্যৱস্থাৰ প্ৰচাৰ আৰু সমাজত বৈষম্যহীন তথা অন্তৰ্ভুক্তিমূলক পৰিৱেশ গঢ়ি তোলাৰ ক্ষেত্ৰত যুৱ প্ৰজন্মৰ গুৰুত্বপূৰ্ণ ভূমিকাক পুনৰ প্ৰতিষ্ঠা কৰে।